സന്തോഷ രാജ്യങ്ങളിലേക്കു വണ്ടി കയറുമ്പോൾ
അക്കരപച്ചതേടിയുള്ള യാത്രയിലാണ് നാമെല്ലാം . മറു കരയിൽ ജീവിതം കൂടുതൽ സുന്ദരമെന്നാണ് എക്കാലത്തെയും മനുഷ്യന്റെ വ്യാമോഹം. മനുഷ്യന്റെ ചരിത്രം കുടിയേറ്റകഥകളുമായി എന്നും ബന്ധപ്പെട്ടുകിടക്കുന്നു. ഗൾഫ് തീരങ്ങളിൽ പത്തേമാരികളിൽ എത്തിപ്പെട്ട മലയാളികളുടെ കഥകൾ നമുക്കറിയാം . എന്നാൽ സ്വർഗം തേടിയുള്ള യാത്രകൾ പലപ്പോഴും പുതിയ വെല്ലുവിളികളാണ് സമ്മാനിക്കുന്നത്.
സന്തോഷരാജ്യങ്ങളിലെ ആനന്ദം നിറഞ്ഞ ജീവിതം സ്വപ്നം കണ്ടു കൊണ്ട് എത്തിപ്പെടുവാൻ ആഗ്രഹിക്കുന്നവരുടെ എണ്ണം ക്രമാതീതമായി വർദ്ധിച്ചിരിക്കുന്നു. ഇവിടങ്ങളിലെ തൊഴിൽ, പഠന അവസരങ്ങളുടെ ആകർഷകമായ പരസ്യങ്ങളുമായി സാമൂഹിക മാധ്യമങ്ങളും വ്‌ളോഗുകളും വെബ് സൈറ്റുകളും പിന്നിലല്ല. ഫിന്നിഷ് ഭാഷാ പരിജ്ഞാനമില്ലാതെ മാസങ്ങൾക്കുള്ളിൽ കുടുംബത്തോടൊപ്പം പറക്കാമെന്നുള്ള തെറ്റായ പരസ്യങ്ങളിൽ ആകൃഷ്ടരായി ചതിക്കുഴികളിൽ പെടുന്നവരുമുണ്ട്
മറ്റു രാജ്യങ്ങൾക്കു കണ്ടു പഠിക്കുവാൻ ഇവിടുത്തെ പല നല്ല മാതൃകകകളും പലപ്പോഴായി ലേഖനങ്ങളാക്കിയിട്ടുണ്ട് . എന്നാൽ ‘സന്തോഷ രാജ്യത്തിൻറെ ടാഗ്‌ലൈനിൽ’ ഇവിടങ്ങളിൽ ആദ്യമായി എത്തിപ്പെടുന്നവർ അറിഞ്ഞിരിക്കേണ്ട മുഖ്യമായ വിഷയങ്ങളാണ് പരാമർശിക്കുന്നത്. എന്റെ വർഷങ്ങളായുള്ള ഫിൻലൻഡ് ജീവിതത്തിൽ നിന്നും അടുത്തറിഞ്ഞ ചില നിരീക്ഷണങ്ങൾ.
കാലാവസ്ഥയും സംസ്കാരവും ജീവിത രീതികളും മലയാളിയുടെ കാഴ്ചപ്പാടിൽ നിന്നും തികച്ചും വ്യത്യസ്തമാണ് നോർഡിക് രാജ്യങ്ങളിലേത്. പുതിയ രാജ്യത്തിന്റെ, പ്രതീക്ഷകളും കൗതുകങ്ങളുമായി എത്തിപ്പെടുന്നവർക്കു, തങ്ങൾക്കു പരിചിതമല്ലാത്ത പല സാഹചര്യങ്ങളിലും, വെല്ലുവിളികൾ നേരിടേണ്ടതുണ്ട്. പുതിയ ജീവിത ശൈലികളുമായി പൊരുത്തപ്പെടാനാവാതെ നിരാശരായി മടങ്ങിയവരുമുണ്ട്.
സ്വന്തം അധ്വാനത്തിൽ ജീവിക്കുവാനുള്ള മനസ്സ് അനിവാര്യം
സർവകലാശാലകളിൽ പഠിക്കുവാൻ വരുന്ന യുവജനങ്ങൾ ദൈനം ദിന ജീവിത ചെലവുകൾക്ക് പലപ്പോഴും (പാർട്ട് ടൈം) തൊഴിലുകളിൽ ഏർപ്പെടാറുണ്ട്. ഹോട്ടലുകളിൽ പണിയെടുക്കുക, വീടുകളിൽ പോയി കൊച്ചു കുട്ടികളെ പരിരക്ഷിക്കുക, ശുചീകരണ പണികളിൽ ഏർപ്പെടുക ഇവയൊക്കെ സ്വാഭാവികമാണ് . ഇത് വിദേശ രാജ്യങ്ങളിൽ യുവജനങ്ങൾ സ്വാഭാവികമായും ഏർപ്പെടുന്ന തൊഴിലുകളാണ് .
നാട്ടിലുള്ള മാതാപിതാക്കൾ അതൊരു അഭിമാനപ്രശ്നമായി കണ്ടു നിരാശരാകുന്ന കാഴ്ചകൾ കാണാറുണ്ട്. ‘പണിയെടുത്തു ജീവിക്കുക’ എന്നതാണ് ഇവിടുത്തെ സമ്പ്രദായം. ഏതു തൊഴിൽ എടുക്കുന്നു എന്നതിലല്ല എന്ത് തൊഴിലും എടുത്തു അവനവന്റെ തണലിൽ ജീവിക്കുക എന്നതിനാണ് പ്രാമുഖ്യം
വീട്ടുപണികളെല്ലാം സ്വന്തമായി
വീട്ടുവേലകളെല്ലാം സ്വന്തമായി ചെയ്യുവാൻ സജ്ജരാകണം .ആഹാരം പാകം ചെയ്യുന്നതും, വീട് വൃത്തിയാക്കുന്നതും , വസ്ത്രങ്ങൾ കഴുകുന്നതും ,കടകളിൽ പോയി സാധനങ്ങൾ വാങ്ങുന്നതുമെല്ലാം സ്വന്തമായി. വീട്ടുജോലികൾക്കു സഹായിയെ പ്രതീക്ഷിക്കേണ്ടതില്ല. മനുഷ്യാദ്ധ്വാനത്തിനു വലിയ വേതനം കൊടുക്കേണ്ട രാജ്യങ്ങളാണിത് . അതിനാൽ അതിസമ്പന്നർക്കുമാത്രം പ്രാപ്യമായ ഒന്നാണിത്. വീടുകളിലെ അറ്റകുറ്റപണികളുമെല്ലാം സ്വയം ചെയ്യേണ്ടി വരും. ചെറിയ ഇലക്ട്രിക്ക് , പ്ലംബിംഗ് പണികളുടെ അടിസ്ഥാന അറിവും സഹായകമാകും. എന്തിനു ,സ്വന്തം വീടുപണിയുന്നതുവരെ സാധാരണയായിഫിന്നിഷുകാർ കുടുംബക്കാരും സുഹൃത്തുക്കളുമൊത്താണ്.
അധ്വാനിക്കാനുള്ള മനസ്സുമായി വണ്ടി കയറണമെന്നു സാരം.
കാലാവസ്ഥ നൽകുന്ന വെല്ലുവിളികൾ
കഠിനമായ ശൈത്യത്തിലൂടെയും പോളാർ രാത്രികളിലൂടെയും കടന്നു പോകുന്ന രാജ്യം. രാജ്യത്തിൻറെ വടക്കൻ മേഖലകളിൽ മൂന്നു മാസക്കാലം സൂര്യപ്രകാശമേൽക്കാത്തവർ. ഇരുട്ടിലും തണുപ്പിലും നിരാശരായവർ. പഠിക്കുവാൻ വരുന്ന യുവജനങ്ങൾ പലപ്പോഴും ഒറ്റയ്ക്കുള്ള ജീവിതത്തിൽ വിഷാദരോഗങ്ങളിൽ അകപ്പെടാറുണ്ട്. തീവ്രമായ കാലാവസ്ഥയും ഏകാന്തതയും നിരാശയിലേക്കു നയിക്കുന്നു
സൂര്യപ്രകാശത്തിന്റെ കുറവ് പരിഹരിക്കാൻ വിറ്റാമിൻ ഡി ദിനംപ്രതി കഴിക്കേണ്ടത് അനിവാര്യം. ഐസിൽ അശ്രദ്ധമായി നടന്നാൽ അപകടങ്ങൾ ഉണ്ടാകാറുണ്ട്.
വേനൽക്കാലത്തു പാതിരാത്രിയിലും ഉണര്ന്നു നിൽക്കുന്ന സൂര്യനാണെങ്കിൽ ശൈത്യകാലത്തു പകൽ സമയങ്ങളിൽ ഇരുട്ടും പ്രതീക്ഷിക്കണം .ഈ വൈരുധ്യം നിറഞ്ഞ കാലാവസ്ഥകളെ അഭിമുഖീകരിക്കണം.
ശീതകാലം പലപ്പോഴും രോഗങ്ങൾ കൊണ്ടുവരാറുണ്ട്. അന്തരീക്ഷ മലിനീകരങ്ങൾ കുറവാണെങ്കിലും വരണ്ട കാലാവസ്ഥ, തൊക്കു സംബന്ധമായ രോഗങ്ങൾ വിളിച്ചുവരത്തുന്നു. കാലഭേദങ്ങളിൽ പ്രതീക്ഷിക്കാത്ത പല രോഗങ്ങളെയും നേരിടാൻ സജ്ജമാകണം.
നാട്ടിൽ സ്വന്തമായി വാഹനം ഓടിച്ചു പരിചയമുള്ളവരും ഇവിടുത്തെ ഡ്രൈവിംഗ് നിയമങ്ങൾ പഠിക്കുന്നതാണ് അഭികാമ്യം . ഐസിലും ഇരുട്ടിലും മഞ്ഞിലുമുള്ള പ്രത്യേക പരിശീലനം ഇവിടുത്തെ കാര്യക്ഷമമായ ഡ്രൈവിങ്ങിനു പ്രയോജനപ്പെടും.
ആരോഗ്യമേഖല
ആരോഗ്യമേഖലകൾ നമ്മുടേതിൽ നിന്നും വ്യത്യസ്തമാണ്.
സ്വകാര്യ മേഖലയിൽ ആശുപത്രികൾ പടർന്നു പന്തലിച്ചു കിടക്കുന്ന നമ്മുടെ നാട്ടിൽ ഡോക്ടർ സേവനങ്ങൾ ഇഷ്ടാനുസരണം തിരഞ്ഞെടുക്കാം. പകൽ സമയങ്ങളിൽ മാത്രമാണ് ഇവിടെ സ്വകാര്യ ക്ലിനിക്കുകൾ മിക്കവാറും പ്രവർത്തിക്കുന്നത്.
പൊതു മേഖലയിലെ ആശുപത്രികളാണ് പ്രധാനമായും. മികച്ച ആരോഗ്യസംരക്ഷണ സംവിധാനമുണ്ടെന്ന് അവകാശപ്പെടുമ്പോഴും അനായാസേന സ്പെഷ്യൽ ഡോക്ടർമാരുടെ സേവനങ്ങൾ ലഭ്യമാവില്ല . അത്യാഹിത സന്ദർഭങ്ങൾ കൂടുതൽ ഗൗരവമായി കൈകാര്യം ചെയ്യുമ്പോൾ, ദൈനംദിന ജീവിതത്തെ ബാധിക്കുന്ന സാധാരണ രോഗങ്ങൾക്ക് ഡോക്ടർ സേവങ്ങൾ നമ്മുടെ ഇങ്കിതമനുസരിച്ചു സാധ്യമല്ല താനും.
ചെറിയൊരു ജലദോഷപനിക്കും ആന്റിബയോട്ടിക്കുകൾ കഴിച്ചു ശീലമുള്ള ഇന്ത്യക്കാർക്ക് , ഡോക്ടറുടെ കുറിപ്പില്ലാതെ ഫാർമസികളിൽ നിന്നും ഇവ ലഭ്യമാകാതെ വരുമ്പോൾ അസ്വസ്ഥരാകാറുണ്ട് .
സൗഹൃദങ്ങളിലെ അകലം
സൗഹൃദങ്ങളിലും കുടുംബബന്ധങ്ങളിലും ഒരു ചെറിയ അകലം കല്പിക്കുന്നവരാണ് ഭൂരിഭാഗം ഫിന്നിഷുകാരും. തങ്ങളുടേതായ ഇടങ്ങളിൽ ആനന്ദവും സമാധാനവും കണ്ടെത്തുന്നവർ. പ്രത്യേകിച്ചും വിദേശികളുമായി ചങ്ങാത്തം കൂടാൻ പൊതുവെ താല്പര്യപ്പെടാത്തവർ. മറ്റു ദേശക്കാരെ വിശ്വാസത്തിൽ എടുക്കാൻ തങ്ങൾക്കു കൂടുതൽ സമയം വേണ്ടിവരാറുണ്ടെന്നാണ് ഇവരുടെ പൊതുവായ അഭിപ്രായം. സർവകലാശാലകളിലും തൊഴിലിടങ്ങളിലും അയൽപക്കസൗഹൃദങ്ങളിലുമെല്ലാം ഇതിന്റെ പ്രതിഫലനങ്ങൾ വീക്ഷിക്കാം.
വർഷങ്ങളെടുത്തു ഇവരുമായി ചങ്ങാത്തം സ്ഥാപിച്ചെടുക്കാം. ഒരിക്കൽ നേടിയെടുത്ത വിശ്വാസം സ്ഥായിയാണ്. അതുപോലെ അനാവശ്യമായി അന്യരിൽ അവരുടെ ആശയങ്ങൾ അടിച്ചേൽപ്പിക്കാൻ ശ്രമിക്കാത്തവർ . അന്യന്റെ സ്വാതന്ത്ര്യത്തെയും മാനിക്കുന്നവർ.
ഡിജിറ്റൽ മേഖലയുടെ അതിപ്രസരം
പേപ്പറുകളിൽ അപേക്ഷകൾ എഴുതുന്ന സാഹചര്യങ്ങൾ വിരളമാണ്.
ഓൺലൈൻ സേവനങ്ങളാണ് എവിടെയും. ബാങ്ക്, ആശുപത്രി, ഇൻഷുറൻസ് സേവനങ്ങളെല്ലാം ഓൺലൈൻ വഴി . പ്രത്യേകിച്ചും മൊബൈൽ അപ്ലിക്കേഷൻ വഴിയാണ് പല സേവനങ്ങളും. പൊതു ഗതാഗത ടിക്കറ്റുകൾ, ആശുപത്രി സേവനങ്ങൾ ഇവയ്ക്കൊക്കെ പ്രത്യേകം അപ്ലിക്കേഷനുകൾ ഉണ്ടാവും. വിദ്യാലയങ്ങളിൽ അധ്യാപകരുമായി രക്ഷിതാക്കൾ സംവദിക്കുന്നതും പ്രത്യേക അപ്ലിക്കേഷനുകൾ വഴി. പല കരാറുകളും ഡിജിറ്റലായി ഒപ്പിടുന്ന സംവിധാനമാണ് പൊതുവെ
പണമിടപാടുകൾ ബാങ്ക് കാർഡുകൾ വഴിയാണ് . ചുരുക്കം ചില സന്ദർഭങ്ങളിൽ മാത്രമാണ് നോട്ടുകളുടെ ആവശ്യം.
ഭക്ഷണശീലങ്ങൾ
തണുപ്പുരാജ്യമായാലും കുടിക്കുവാൻ ഇവർക്ക് പ്രിയം തണുത്ത വെള്ളം തന്നെ. തീന്മേശയിൽ ചൂട് വെള്ളത്തിന് സ്ഥാനമില്ല. ലോകത്തിലെ വലിയ കാപ്പി, ബിയർ കുടിയന്മാരുമാണിവർ. എവിടെയും നമ്മുടെ നാടൻ ചായ സ്വപ്നത്തിൽ പോലും പ്രതീക്ഷിക്കേണ്ടതില്ല.
മാംസവും ചീസുമെല്ലാം നന്നായി അകത്താക്കുന്നവരാണിവർ. ഉരുളക്കിഴങ്ങും സാലഡുമൊക്കെയാണ് സ്ഥിരം വിഭവങ്ങൾ. നമ്മുടെ ഭക്ഷണശീലങ്ങളിൽ ഒഴിവാക്കാനാവാത്ത മസാലകൾക്ക് ഇവിടെ വലിയ പങ്കില്ല. ചുരുങ്ങിയത് ഉപ്പും കുരുമുളകും പ്രതീക്ഷിക്കാം. യൂണിവേഴ്സിറ്റികളിൽ നിന്നും സ്കൂളുകളിൽ നിന്നുമെല്ലാം സമാന ഭക്ഷണശീലങ്ങൾ പരിശീലിക്കേണ്ടതുണ്ട് .
പരിമിതമായുള്ള ഇന്ത്യൻ റസ്റ്റോറന്റുകൾ ഈ നാട്ടുകാരുടെ രുചികൾ പരിപോഷിപ്പിക്കുവാൻ എരിവും പുളിയും കുറച്ചുള്ള ആഹാരമാണ് തയ്യാറാക്കുന്നത്. വടക്കേ ഇന്ത്യൻ പാചകമാണ് പ്രധാനമായും. നാടൻ കേരള വിഭവങ്ങൾക്ക് സ്വന്തം അടുക്കളയിൽ തന്നെ അദ്ധ്വാനിക്കേണ്ടതുണ്ട്.
രാവിലെ പതിനൊന്നു മണിക്ക് ഉച്ചഭക്ഷണവും അഞ്ചു മണിക്ക് അത്താഴവും കഴിക്കാൻ ശീലിക്കേണ്ടതുണ്ട്. തീൻമേശയിൽ കത്തിയും മുള്ളും ഉപയോഗിക്കുന്ന പാശ്ചാത്യസംസ്കാരം പ്രത്യേകം പരാമര്ശിക്കേണ്ടതില്ലല്ലോ
ഭാഷയും പ്രയോഗങ്ങളും
തദ്ദേശീയർ ഇംഗ്ലീഷ് നന്നായി കൈകാര്യം ചെയ്യുമ്പോഴും, എവിടെയും ഫിന്നിഷ് ഭാഷയുടെ അതിപ്രസരമാണ്. സൂപ്പർമാർക്കറ്റുകളിലും ഓൺലൈൻ ഷോപ്പുകളിലും ഫിന്നിഷ് ഭാഷയിലാണ് എഴുത്തു. താരതമ്യേന വൈഷമ്യമേറിയ ഭാഷയാണിത്. ഗൂഗിൾ ട്രാൻസ്ലേറ്റർ പോലുള്ള ഭാഷാ പരിഭാഷ സഹായികൾ പലപ്പോഴും സന്തത സഹചാരിയാക്കേണ്ടതുണ്ട്.
ഭാഗികമായി ഐ ടി മേഖല ഒഴിച്ച്. മറ്റെവിടെയും ഫിന്നിഷ് ഭാഷയിലെ പ്രാവിണ്യം തൊഴിലുകൾക്കും അനിവാര്യം. മറ്റു തൊഴിൽ മേഖലകളിൽ ചുരുക്കം ചിലർ മാത്രമാണ് ഫിന്നിഷ് ഭാഷാ പ്രാവീണ്യമില്ലാതെ പ്രവേശിച്ചിട്ടുള്ളത്.
പങ്കാളിയുടെ വിസയിൽ എത്തിപ്പെടുന്നവരിൽ പലർക്കും , വിദഗ്ധ തൊഴിലുകളിൽ അനുഭവജ്ഞാനമുണ്ടെങ്കിലും അവരുടെ മേഖലകളിൽ പ്രവേശിക്കുവാൻ സാധിക്കാതെ വരാറുണ്ട്. ഭാഷാ ജ്ഞാനമില്ലാത്തതാണ് മുഖ്യമായ കാരണം.
ബാങ്ക്, വിദ്യാലയങ്ങൾ, ആശുപത്രികൾ, ഇൻഷുറൻസ് സ്ഥാപനങ്ങൾ എന്നിവിടങ്ങളിൽ പലപ്പോഴും അപേക്ഷകൾ ഫിന്നിഷ് ഭാഷയിലായിരിക്കും രേഖപ്പെടുത്തേണ്ടത്.
ഇംഗ്ലീഷ് ഭാഷാ സ്കൂളുകൾ നന്നേ കുറവായതിനാൽ ഫിന്നിഷ് ഭാഷാ വിദ്യാലയങ്ങളിൽ കുട്ടികളെ പ്രവേശിപ്പിക്കേണ്ടതായി വരും. പ്രാദേശിക സ്കൂളുകളിൽ ഇംഗ്ലീഷ് ഭാഷ, ഒരു പാഠ്യ വിഷയമാണ്. സ്വീഡിഷ്, ഇവിടുത്തെ മറ്റൊരു ഔദ്യോഗിക ഭാഷ ആയതിനാൽ സ്വീഡിഷ് ഭാഷയും വിദ്യാലയങ്ങളിൽ നിർബന്ധമായും പഠിച്ചിരിക്കണം.ഇംഗ്ലീഷിലുള്ള ഉന്നത വിദ്യാഭ്യാസ അവസരങ്ങളും പരിമിതമാണ്
പൊതുവെ തുല്യത പ്രകടമായ സമൂഹത്തിൽ , വേർതിരിവുകൾ തുച്ഛമാണ്. അതിനാൽ തന്നെ ‘സാർ’, ‘മാഡം’ വിളികൾ എവിടെയുമില്ല. വിദ്യാലയങ്ങളിലും സർവകലാശാലകളിലും അധ്യാപകരെ പേര് വിളിച്ചാണ് അഭിസംബോധന .തൊഴിലിടങ്ങളിലും അയല്പക്ക സൗഹൃദങ്ങളിലുമെല്ലാം സമാന സംസ്കാരമാണ് . പരിചയപ്പെടലുകളിൽ തന്റെ കുടുംബത്തോടൊപ്പം, വീട്ടിലെ നായയെയും പൂച്ചയേയും പരിചയപ്പെടുത്തുന്നതിൽ അധഃഭുതം കൊള്ളേണ്ടതില്ല. വളർത്തു മൃഗങ്ങളും ഇവർക്ക് സ്വന്തം.
സത്യസന്ധതയ്ക്കും വശ്വാസത്തിനും പ്രാധാന്യം കൊടുക്കുന്ന സമൂഹമാണിത്. തൊഴിലിടങ്ങളിലും സാമൂഹിക ജീവിതത്തിലും,അറിയാത്ത കാര്യങ്ങൾ വിനയപൂർവം ‘അറിയില്ലാ’ എന്നറിയിക്കുന്നതാണ് അഭികാമ്യം.
സർവകലാശാല വിദ്യാർത്ഥികളുടെ ആശങ്കകൾ/ അനുഭവങ്ങൾ
സൈബർ സെക്യൂരിറ്റിയിൽ ബിരുദാനന്തര ബിരുദ കോഴ്സിന് തുർക്കുവിൽ എത്തിയ വയനാട്ടുകാരൻ അലൻ ബി തോമസിന്റെ അഭിപ്രായത്തിൽ ‘മഞ്ഞിലെ മായാലോകം ചിത്രങ്ങളിൽ മാത്രം വര്‍ണശബളമാണ്. എന്നാൽ അതിലെ ജീവിതം ക്ലേശങ്ങൾ നിറഞ്ഞതും.’ വിദേശികളുമായി ചങ്ങാത്തം കൂടാൻ തങ്ങൾക്കു വിമുഖതയുണ്ടെന്നു ഒരു ഫിന്നിഷ് സുഹൃത്ത് പറഞ്ഞതും അലൻ ഓർത്തെടുക്കുന്നു. ജീവിതം എന്തെന്നു പഠിക്കുവാൻ, ഈ പ്രവാസ ജീവിതം തന്നെ സഹായിച്ചുവെന്നാണ് അലന്റെ അഭിപ്രായം.
ലപ്പീൻറന്ത യൂണിവേഴ്സിറ്റി ഓഫ് ടെക്നോളജിയിൽ, മെക്കാനിക്കൽ എഞ്ചിനീയറിംഗിൽ ബിരുദാനന്തര ബിരുദത്തിന്‌ എത്തിയ കൊല്ലം സ്വദേശി ദേവിക ശശിയുടെ അനുഭവമിങ്ങനെയാണ് .
പഠനം ചെറിയ നഗരങ്ങളിലാണെങ്കിൽ, പ്രാരംഭദശയിൽ പ്രയാസമേറും. പ്രത്യേകിച്ചും സർവകലാശാലകളിൽ അന്താരാഷ്ര വിദ്യാർത്ഥി സമൂഹം ഇല്ലാത്തപക്ഷം, സൗഹൃദങ്ങൾ ഉണ്ടാക്കാൻ ബുദ്ധിമുട്ടാണ്. ശീതകാലത്തെ ഇരുട്ടും തണുപ്പും ഒറ്റപ്പെടലും മാനസികാരോഗ്യത്തെ ബാധിക്കും .
പഠനകാലത്തു പാർട്ട് ടൈം ജോലി നേടിയെടുക്കാൻ, ഹെൽസിങ്കി ഒഴികെയുള്ള നഗരങ്ങളിൽ ബുദ്ധിമുട്ടാണ്. അതിനാൽ പഠനകാലയളവിലെ മുഴുവൻ ചിലവുകളും സ്വന്തം പോക്കറ്റിൽ നിന്നും എടുക്കേണ്ടതുണ്ട്.പാർട്ട് ടൈം ജോലിയിൽ നിന്നും ട്യൂഷനും ജീവിതച്ചെലവും വഹിക്കുന്നത് മറ്റ് രാജ്യങ്ങളിലെന്നപോലെ ഫിൻലൻഡിൽ കാര്യക്ഷമമായി പ്രവർത്തിക്കുന്നുമില്ല.
തൊഴിൽ രഹിതരാകുമ്പോൾ, സർക്കാർ സാമ്പത്തിക സഹായം നൽകുമ്പോഴും, ഒരു പുതിയ തൊഴിൽ കണ്ടെത്തുന്നതുവരെയുള്ള ഈ സഹായം പലപ്പോഴും ആശങ്കകൾ നിറഞ്ഞതാണ് . പല സന്ദര്ഭങ്ങളിലും , തൊഴിൽ രഹിതരുടെ എണ്ണം കുറയ്ക്കാൻ, നമ്മുടെ ബിരുദവുമായി ബന്ധമില്ലാത്ത ജോലികളിൽ പ്രവേശിക്കേണ്ടതായിവരും.
2021 ൽ യൂണിവേഴ്സിറ്റി ഓഫ് ഹെൽസിങ്കിയിൽ ഗവേഷണത്തിനു എത്തിയ തിരുവനന്തപുരം സ്വദേശി ആരതി പ്രീത് ബാബുവിനു സമാന അനുഭവമാണ്. മിതഭാഷികളായ ഫിന്നിഷുകാർ, പ്രത്യേകിച്ചും വിദേശികളുമായി അകലം പാലിക്കാറുണ്ട്. വിദേശികൾ പ്രയത്നമിട്ടാൽ മാത്രം ചങ്ങാത്തം കൂടുന്നവർ . രാവിലെ നേരത്തെ വന്നു വൈകുന്നേരം വേഗത്തിൽ ജോലി അവസാനിപ്പിക്കുന്നവർ. മന്ദ ഗതിയിലുള്ള തൊഴിൽ സംസ്കാരമാണിവിടെ . അതിനാൽ സമ്മർദ്ദങ്ങൾ കുറവാണെങ്കിലും ഗവേഷണങ്ങൾ പൂർത്തീകരിക്കാൻ കൂടുതൽ സമയം എടുക്കാറുണ്ട്.
കുടുംബവുമൊത്തുള്ള ജീവിതം സ്വപ്നം തേടിയെത്തുമ്പോൾ
തുച്ഛമായ വേതനത്തിൽ ഇവിടങ്ങളിൽ എത്തുന്നവർക്ക്, കുടുംബത്തെ കൂടെ കൂട്ടാൻ വീണ്ടും പല ബാലികേറാമലകളിലൂടെ സഞ്ചരിക്കണം . തങ്ങളുടെ ശമ്പളം കൊണ്ട് കുടുംബത്തെ മുഴുവനായി കൊണ്ടുവരുവാൻ സാധിയ്ക്കാത്ത നഴ്സസ്മാരെ പരിചയമുണ്ട് . സ്വന്തം കുടുംബത്തിൽ നിന്നും, വിദൂരത്തിലുള്ള ജീവിതത്തിൽ നിരാശരായവരുമുണ്ട്.
പങ്കാളിയുടെ വിസയിൽ ഇവിടെ എത്തിച്ചേരുന്നവർക്ക്, നഴ്‌സിംഗ് പോലുള്ള വ്യത്യസ്തമായ മേഖലകളിലെ പരിശീലനത്തിൽ പ്രവേശിക്കേണ്ടി വരാറുണ്ട്. ഫിന്നിഷ് ഭാഷാ പരിശീനത്തിനുശേഷമാണ് തൊഴിൽ പരിശീലനം. ഈ മേഖലയിലെ തൊഴിലാളികളുടെ ധൗർലഭ്യം മൂലമാണിത്.
താരതമ്യേനെ ജീവിത ചിലവുകൾ ഏറിയ രാജ്യമാണിത് .ആയതിനാൽ ഇന്ത്യൻ കറൻസിയിലെ തത്തുല്യമായ മൂല്യത്തിൽ ആകൃഷ്ടരായി കുറഞ്ഞ വേതനത്തിലെ തൊഴിലുകൾ സ്വീകരിക്കുമ്പോൾ, പ്രായോഗികമായി ചിന്തിക്കേണ്ടതുണ്ട്‌.
സകുടുംബം സ്ഥിരതാമസമാക്കാമെന്ന പ്രത്യാശയിൽ കടൽ കടക്കുമ്പോൾ , പരിഗണിക്കേണ്ട കാതലായ ചില യാഥാര്‍ത്ഥ്യങ്ങൾ
സുഖ ദുഃഖ സമ്മിശ്രമാണ് ഏതൊരു നാടും . നിമ്നോന്നതങ്ങൾ നിറഞ്ഞ ജീവിതപാതകൾ. നാം കാണുകയും അനുഭവിച്ചറിയുകയും ചെയ്യാത്ത, പുതിയ ജനസഞ്ചയത്തിന്റെ ശരി തെറ്റുകളും, സംസ്കാരവുമെല്ലാം ഉൾക്കൊള്ളുവാനുള്ള ഹൃദയവിശാലത പ്രവാസ ജീവിതം ഒരുവന് നൽകുന്നു. വ്യത്യസ്തതകളെ നിർഭയം അംഗീകരിക്കുവാനുള്ള മനസ്.
എന്നാൽ സന്തോഷ രാജ്യങ്ങളിലെ സ്വപ്നലക്ഷ്യങ്ങളിൽ എത്തിപ്പെട്ടാൽ ജീവിതം കരകയറും എന്ന സ്വപ്നത്തിൽ വണ്ടി കയറുന്നവർ നേരിടേണ്ട യാഥാർഥ്യങ്ങളുടെ ഒരു ചെറിയ അവലോകനമാണിത്. പുതിയ കാലാവസ്ഥയും ഭൂപ്രകൃതികളും ഭാഷയും ആഹാര രീതികളും സാമൂഹിക ജീവിതവുമെല്ലാം ഉൾക്കൊണ്ടു ജീവിക്കുവാനുള്ള ആർജവം അനിവാര്യം.
നവമി ഷാജഹാൻ
